Tu’ske deyin u’shewlep bir qatar pali’z na’llerin qari’qlarg’a woti’rg’i’zi’p shi’qti’q. Iytimiz Reks te qasi’mi’zdan tabji’lmastan, ha’r bir isimizge di’qqat penen qarap woti’r.

Apam: -Ayqi’z, u’ydegi aq terektin’ na’llerin ali’p qayt! Birotala  wolardi’ da  tigip boli’p, son’ tu’slikke shi’g’a qoyayi’q,-dedi. Men worni’mnan zorg’a qozg’ali’p, su’yretilip u’yge kettim. Bir jag’i’nan sharshap, bir jag’i’nan qatti’ ash bolg’an yedim-da’. Reks te jalpi’ldap, mag’an yerip u’yge keldi.  Men na’llerdin’ barli’g’i’n ko’teriwge yerinip,  qoli’ma  ilingenin aldi’m. Qarasam, apam menen a’japam islep ati’rg’an jumi’slari’n qoyi’p mag’an qarap tur. Men hayran qali’p: «Bular nege mennen ko’zin u’zbey qarap tur»,-dep qi’zi’qsi’ni’p a’ste kele berdim. Jaqi’nlag’annan apam: -Qara, iytin’ sennen qalg’an na’llerdi ali’p kiyati’r,-dedi. Men arti’ma qaradi’m. Rasi’nda da, Reks awzi’na u’sh-to’rt na’ldi tislep ali’p kiyati’r yeken. Wol tuppa-tuwri’ menin’ aldi’ma keldi de, awzi’ndag’i’ na’llerdi jerge qoydi’. Buni’ ko’rip turg’an apam ku’lip: -A’ne ko’rdin’ be,  qi’zi’m, senin’ shala qalg’an isin’di Reks te bilip, qalg’an na’llerdi wo’zi ali’p keldi,-dedi. Men Rekstin’ bul isinen su’ysindim. Wog’an bolg’an mehrim ja’ne de ku’sheydi. Kishkene bolsam da, sonda iytlerdin’ mehriban ha’m sadi’q yekenligin an’ladi’m.

Zuxra ABDULLAEVA

QMU jani’ndag’i’ akade­miyali’q liceydin’ woqi’wshi’si’