-Apa, men de qalag’a barayi’n.

-Sag’an qalada ne bar?! Barsan’ anani’ a’per, mi’nani’ a’per dep miyimdi jeysen’. Wonnansha u’yde qali’p, woyna,-dedi apam baqi’ri’p.

-Wonda, mag’an Gu’laydanikindey shilter ko’ylek a’kelip bersen’iz qalaman,-dedim apama sha’rt qoyi’p.

-Yaqshi’ qi’zi’m, a’kelip beremen. A’japan’a ko’mekles, bolama, -dep apam bazarg’a ketti. Jumi’slardi’ shala islesem de, wo’zimshe u’lken is pitirgendey a’japama: «A’japa, siz aytqan ha’mme jumi’slardi’ islep boldi’m»,-dedim mardi’yi’p.

A’japam da: «Way-buw, menin’ u’kem shap-shaqqan yeken g’oy»,-dedi meni marapatlap. Men wonnan sayi’n quwani’p qoya berdim. Tu’ske shekem apamni’n’ joli’na qayta-qayta qarap an’li’w menen ju’rdim. Bir waqi’tta ali’stan yeki sumka ko’tergen apam ko’rindi. Juwi’ri’p qasi’na  bardi’m da; «Apa, mag’an ko’ylek aldi’n’i’z ba?-dep soradi’m. «Awa, aldi’m qi’zi’m, dep apam meni quwantti’.

Men u’yge bari’wdan sumkalardi’ tez-tez aqtari’p, taza ko’ylekti tawi’p aldi’m. Qi’p-qi’zi’l, sup-suli’w ko’ylekti kiyip, u’ydegilerdin’ ha’mmesine ko’rsetip shi’qti’m. «Menin’ qi’zi’m, sup-suli’w boli’p ketipti-g’oy. Ko’z tiymesin»,-dep atam yerkeletti. Apam: «Qi’zi’m, yendi ko’ylekti sheship qoy, qi’di’rg’anda kiyesen’»,-degen ga’pin de, ti’n’lamay, tuwri’ dosti’m Gu’laydani’n’ u’yine kettim. Men wog’an ko’ylegimdi ko’rsetip maqtandi’m.

-Sen de ko’ylegin’di kiyip shi’q,-dedim. Wol bolsa: -«Ha’zir woynamayman, u’keme qarawi’m kerek,-dep u’yine kirip ketti. Yendi kim menen woynasam yeken dep tursam, yadi’ma Men’libek tu’sti. Da’rhal woni’n’ u’yine qaray ju’rdim. U’yinin’ aldi’nda tawi’qlari’ da’n jep ati’r yeken. Bir waqi’tta qi’zi’l qorazi’ meni ko’riwden mag’an qaray juwi’ri’p kiyati’r. Men qori’qqani’mnan u’yge qaray qashti’m. Keynime qayi’ri’li’p qarasam, qi’zi’l qoraz yele quwi’p kiyati’r. Ku’nde wo’te almaytug’i’n qoradan qalay sekirip wo’tkenimdi de bilmey qaldi’m. Arti’ma qarayman dep, aldi’mdag’i’ baqang’a su’rnigip ji’g’i’ldi’m. U’stimdegi taza ko’ylek ji’rti’li’p, shan’-shan’ boldi’. Men ji’lawi’mdi’ ku’sheytip, u’yge qaray juwi’rdi’m. Qoraz bolsa, a’lleqashan ketip qalg’an. Menin’ dawi’si’mdi’ yesitip apam: -«Ne boldi’?  Kim menen uri’si’p kiyati’rsan’? U’yge ji’lap kelme dep sag’an aytti’m g’oy,-dedi ku’yip-pisip. Men soli’g’i’mdi’ basa almay; «Meni hesh kim urg’an joq. Men’libektin’ u’yine bara berme, qorazi’ seni ku’nde bara bergen son’ jaman ko’rip qalg’an-g’o,-dedi apam ku’lip. Men de qali’spay:

-Wonda Men’libektin’ atasi’na ayti’n’, qorazi’n baylap qoysi’n,-dedim. Menin’ ga’pime u’ydegiler ku’lip: «Baylap, wol ne iyt pe?-dedi.

-Bizlerdin’ iytimiz tisleytug’i’n bolg’annan son’, woni’ baylap qoyami’z. Al, Men’libektin’ qorazi’ shoqi’ytug’i’n bolg’an son’, woni’ baylap qoyi’wi’ kerek,-dedim u’ydegilerge aqi’l berip. Tap-taza ko’ylegimnin’ bir maydanda ji’rti’li’p, shan’ bolg’ani’na ashi’wi’m kelip, woni’ sheship ati’p urdi’m da, go’ne ko’ylegimdi kiyip aldi’m.

Buni’ ko’rip turg’an apam: «Taza ko’ylegin’di kiyip bolg’ani’n’ ba?!»,-dedi mi’s­qi’llap ku’lip.

Sol-sol yeken, men qaysi’ dosti’mni’n’ u’yine baratug’i’n bolsam, a’weli shoqi’ytug’i’n qorazi’n’ joq pa?,-dep sorap alatug’i’n boldi’m. Al, Men’libektin’ u’yine bari’p woynawdi’ sharta toqtatti’m...

Balali’g’i’mdag’i’ usi’nday umi’ti’lmas waqi’yalardi’ yeslep, mi’yi’q tarti’p qoyaman.

Nazli’mxan TO’LEGENOVA

Taxtako’pir rayoni’