Yelimizde ha’r ji’li’ wo’tkerilip kiyati’rg’an M.Qori Yakupov ati’ndag’i’ tan’law da ko’rkem wo’nerge qushtar, talantli’ ha’m ziyrek jaslardi’ izlep tabi’w, wolardi’n’ ko’rkem wo’nerge bolg’an qi’zi’g’i’w­shi’li’g’i’n yele de artti’ri’wdan ibarat.

Jaqi’nda usi’ tan’lawdi’n’ Qaraqalpaqstan Respublikali’q basqi’shi’ boli’p wo’tti.Wonda bizin’ mektebimizdin’ 7-klass woqi’wshi’si’ Isa Abdullaev xali’q saz-a’sbaplari’ jo’nelisi boyi’nsha II wori’ndi’ iyeledi.

Kishkeneliginen ko’rkem wo’nerge a’sirese, muzi’kag’a qi’zi’g’i’wshi’li’g’i’ ba’lent bolg’an Isa rayoni’mi’zdag’i’ 16-sanli’ Jiyen ji’raw ati’ndag’i’ balalar muzi’ka ha’m ko’rkem wo’ner mektebinde ustazi’ Polat ag’a Qa’llibekovtan bayan a’sbapi’n shertiwdin’ si’rlari’n u’yrenip ati’r.  Wol ustazi’ni’n’ bergen sabaqlari’ni’n’ na’tiy­jesinde ko’p g’ana tan’lawlarg’a qatnasi’p, jaqsi’ na’tiyjelerge yerisip kiyati’r. Sonday-aq, wol «Nawri’z sazasi’» VI Respublika ko’p dawi’sli’ xali’q sazlari’ ansambli ha’m orkestrleri festivali’ni’n’ belsendi qatnasi’wshi’si’.

-Isa u’lgili, talapshan’ woqi’wshi’. Wol ja’miyetlik jumi’slarg’a da belsene qat­nasadi’. Wol muzi’ka menen shug’i’llani’w menen birge sabaqlari’nan da jaqsi’ woqi’ydi’. «Bilimler bel­le­siwi»ne de qatnasi’p turadi’. Klaslaslari’ woni’ hu’rmet yetedi, sebebi wol ha’mmeden qoli’nan kelgen ja’rdemin ayamaydi’,-deydi klass bas­shi’si’ Aytgu’l apa Baba­nazarova maqtani’sh penen.

 Qullasi’, Isa bu’gingi g’a’rezsiz yelimizdin’ haqi’yqi’y ba’rkamal a’w­ladi’. Wol yele de wo’z u’stinde islep, izlenisten, bilim ali’wdan hesh qashan toqtamay, u’lken tabi’slardi’ qolg’a kirgiziw niyetinde. Biz de Isag’a «Niyetin’ joldasin’ bolsi’n!» dep, aldag’i’ woqi’wlari’nda ha’m do’retiwshilik jumi’s­lari’nda tabi’slar tileymiz.

Aqsu’n’gu’l Aymuratova

Qarao’zek rayoni’