«Jas a’wlad»ti’n’ shad balalari’

Jol boyi’ quwani’shlari’ «qoyni’na si’ymay», juwi’ri’si’p bara­ti’rg’an balalardi’ ushi’ratti’q. Wolardan: «Nege bunsha quwani’shli’si’z?»-dep sorag’ani’mi’zda: -«Bizler «Jas a’wlad»qa bara­ti’rmi’z!»-degen juwapti’ aldi’q.

Dem ali’w worayi’nda 7 jastan 12 jas arali’g’i’ndag’i’ balalardan uli’wma bes gezek dem ali’wi’ mo’lsherlengen boli’p, usi’ ku’ni wolardi’n’ u’shinshi topari’ jayg’as­ti’ri’lmaqta yeken.

-Ha’r bir gezekte 110 bala, ja’mi 550 balani’n’ dem ali’wi’ jobalasti’ri’lg’an. Balalardi’n’ qalay dem ali’p ati’rg’ani’n wo’z ko’zin’iz benen ko’r­genin’iz maqul,-dedi dem ali’w worayi’ basli’g’i’ R.Tan’ir­bergenov.

Woray bir ta’repten «Dosli’q» kanali’ menen, bir ta’repten «Aral» balalar dem ali’w worayi’ menen, u’shinshi ta’repten bolsa, NMPI din’ «Ta’biyat­tani’w» fakultetine qarasli’ ta’biyat bag’i’ menen shegara­las­qanli’g’i’ hawa rayi’ ten’­salmaqli’­li’­g’i’ni’n’ saqlani’­wi’na ja’rdem berip tur­g’anday.

A’debiy kesheler, ha’r tu’rli kewil ashar ilajlar, dene ta’rbiyasi’ shi’ni’g’i’wlari’, shet tillerin u’yretiwshi «Lingvo» kurslari’ (inglis, nemec tilleri) balalardi’n’ ku’n ta’rtibi kestesinen wori’n alg’an. Jas a’wlad­lardi’n’ jazi’n «jazday» yetip wo’tkeriwi ushi’n suw bas­seyni wolardi’n’ xi’zmetinde.

Balalar wo’zlerinin’ qi’zi’­g’i’w­shi’li’qlari’nan kelip shi’qqan halda do’gereklerge qamti’lg’an. Wolar sport­ti’n’ stol tennisi, futbol, basketbol, voleybol tu’rleri menen turaqli’ shug’i’llani’w menen birge «Kim yepshil, kim shaqqan?», «Sap denede-sap aqi’l», «Kewilli startlar» atama­si’ndag’i’ sport jari’slari’ni’n’ qatna­si’w­shi’lari’na aylanbaqta. Woray jani’nan sho’lkemlestirilgen kishi kitapxanada balalarg’a arnalg’an a’debiyatlardi’ taba alasi’z.

Kitapqumar balalar woni’n’ turaqli’ ag’zasi’na aylang’an. Kitapxana sho’l­kemlestiriwshileri Respublikali’q ma’limleme-resurs worayi’ xi’zmet­kerleri U.Turdi’­muratova ha’m Z.Da’w­let­na­zarovalar a’debiy keshe­lerdin’ qi’zi’qli’ wo’tiwin ta’­miyinleydi. Balalardi’ milliy u’rp-a’det, salt-da’stu’r­lerimizge sadi’q yetip ta’rbiyalaw maqsetinde «Sport-ti’ni’shli’q yelshisi» atli’ milliy woyi’n jari’slari’ wo’t­kerilip kelinbekte. Ilajlardi’n’ ishinde yen’ qi’zi’g’i’ «Teris ku’n» ha’m «Quwnaqlar ha’m ziyrekler» tan’lawlari’.

-Balalardi’n’ jazg’i’ dem ali’si’n kewildegidey wo’tkeriwinde «Jas a’wlad»ti’n’ worni’ ayri’qsha. Bi’yi’l da ji’ldag’i’day woqi’wshi’lari’mdi’ usi’ dem ali’s worayi’na ali’p kiyati’rman. Woqi’wshi’lari’m ha’r ji’li’ usi’ worayg’a ali’p keliwimdi soraydi’. «Jas a’wlad» haqi’yqi’y jas a’wladlardi’ ta’rbiyalaytug’i’n woray,-deydi paytaxti’mi’zdag’i’ 25-sanli’ mek­teptin’ «Kamolot» JJH baslang’i’sh sho’lkemi jetek­shisi J.Muxambetkalieva.

Biz worayg’a jetip kelgen waqi’tta balalar uyqi’lap ati’rg’an yedi. A’tirap sonday ti’ni’shli’qqa shu’mgen, balalar uyqi’dan woyani’wi’ menen Ana quyash uyasi’nan shi’qqanday a’tirapqa shadli’q, quwani’sh nurlari’ shashi’ldi’. «Balali’ u’y-bazar» dep usi’ni’ aytsa kerek. Ko’zlerinde ha’m kewillerinde ushqi’ni’ bar balalarg’a quwat berip ati’rg’an bul a’ziz da’rgaydi’n’ sho’lkemlestiriwshilerine aldag’i’ jumi’slari’nda tasqi’n tabi’slar tileymiz.

Gu’lzada WO’TENIYAZOVA

QMUnin’ jurnalistika qa’nigeligi studenti