(gu’rrin’)

Ayzadani’n’ Tomiy isimli ju’da’ mu’layi’m pi’shi’g’i’ bar. Wol ha’r ku’ni pi’shi’g’i’ menen woynap, woni’ awqatlandi’ri’p, hesh qasi’nan qaldi’rmaydi’. Tek g’ana tu’nde Ayzada wo’z worni’nda, al Tomiy bolsa basqa bo’lmede uyqi’laydi’.

Ku’nlerdin’ birinde awi’lda ku’nde bir u’yde ya go’sh, ya tawi’q joyti’latug’i’n boldi’. Gu’manlang’an adamlar Ayzadani’n’ u’yine keldi. Pi’shi’g’i’ «uri’» dep ayi’plag’ani’na ashi’wi’ kelgen Ayzada: -Menin’ usi’ mu’layi’m pi’shi’g’i’m tawi’qti’ qalay tuti’p, go’shti qalay urlaydi’? Bergen awqati’mdi’ zordan ishedi-g’oy!-dep pi’shi’g’i’n aqladi’. Apasi’ da qi’zi’ni’n’ rayi’na qarap, kelgen qon’si’lari’na ba’ne tawi’p qaytari’p jiberdi.

Ayzadani’n’ mu’layi’m degen Tomiyi nag’i’z uri’ pi’shi’q boli’p shi’qti’. Bir ku’ni Tomiy muzlatqi’shtag’i’ go’shti yendi ali’p jey baslag’ani’ sol, Ayzadani’n’ apasi’ kelip qaldi’. Apasi’ni’n’ baqi’ri’si’nan woyani’p ketken wol juwi’ri’p bari’p qarasa, ne ko’z benen ko’rsin Tomiyinin’ awzi’nda u’lken go’sh turi’pti’. Wol pi’shi’g’i’ni’n’ qi’li’g’i’n ko’rip lal boli’p qaldi’. Sebebi, wol Tomiydin’ urli’q isleytug’i’nli’g’i’na hesh isengisi kelmegen yedi-da’! Ayzada ashi’wlani’p: «Mag’an sendey uri’ pi’shi’q kerek yemes.  Apa, yerten’-aq, Tomiydi apari’p taslay g’oyi’n’!»-dedi.  Ashi’wg’a  minip turg’an apasi’na da won’ tu’sti.

Ayzada yendi Tomiysiz woynaytug’i’n boldi’. Wol ha’r waqta pi’shi’g’i’n woylap qoyadi’. Biraq, wol ba’ribir pi’shi’g’i’n qatti’ jaman ko’rip qaldi’.

Ja’nibek JARI’LQAG’ANOV